အားလပ်ရက် စနေနေ့လေးမှာ ညီအမတစ်စု အိမ်မှာစုံကြတယ်။ ဖုန်းတွေနဲ့အဆက်အသွယ်တွေ ရှိကြပေမင့် လူချင်း တွေ့တော့လည်း ပြောစရာစကားတွေက ရှိနေဆဲပင်။

[IMAGE: https://images.ecency.com/DQmNnmts5HAnHEX9pgvoMfrKaZxXMgprF9wyuKiUxBhZW1b/img_20230325_183022_951.jpg]

နေပြည်တော်က အစ်မအလည်ရောက်ခိုက် ဖက်ထုပ်ကြော် လုပ်စားဖြစ်ကြသည်။  ဖက်ထုပ်ထဲထည့်တဲ့ ကျွတ်စာကို ကျမကတော့ သိပ်မကြိုက်ပေမယ့် အိမ်ကတူမတွေက အလွန်ကြိုက်သဖြင့် ဖက်ထုပ်ထဲ စိမ်းမြနေအောင်ထည့်ထားသည်။

[IMAGE: https://images.ecency.com/DQmbHEh7BYXRWsc1QYtvKaqHvUTdFhkVSQgg7Xa6jtiPsdP/img_20230325_185150_683.jpg]

လိုအပ်တဲ့အဆာပလာတွေ ထည့်ပြီးသည့်အခါမှာတော့
ကျမလက်စွမ်းပြချိန်ရောက်ပြီ။ ဝယ်စားတဲ့ဖက်ထုပ်ကြော် တွေက အဆာကနည်းနည်း ဖက်ထုပ်ရွက်ကများများ၊ ဒါမျိုးကိုကျမ
မကြိုက်။ ကိုယ့်အိမ်မှာလုပ်တာဆိုတော့ ကိုယ်ကြိုက်သလို အစာအပြည့်နီးပါးထည့်။ ပြီးတော့ ဖက်ထုပ်ရွက်ကို ရေလေးနည်းနည်းတို့ပြီး ကြည့်ခဲ့ဖူးတဲ့ ဖေ့ဘုတ်က ဗီဒီယိုဖိုင်တွေထဲကလို မျိုးစုံလက်စွမ်းပြဖို့ကြံသည်။

[IMAGE: https://images.ecency.com/DQmdF8fk6eNrD8iidjtpUArCNBy2pHKUM3xkUNA1zNu1kpU/img_20230325_185150_784.jpg]

သို့ပေမင့် တကယ့်လက်တွေ့ကျ ဘာတခုမှ မမှတ်မိပေ။ စားကောင်းရင်ပြီးတာပဲလို့ စိတ်ဖြေပြီး ကိုယ်လုပ်တတ်သလို အနားတွန့်လေးတွေပဲ လုပ်လိုက်ရသည်။ အမကတော့ အထွေအထူး လုပ်မနေပဲ ဖက်ထုပ်ရွက်အနားကို ဒီတိုင်း ကပ်ချလိုက်သည်။ အားလုံးလုပ်ပြီးတော့ ကြော်ဖို့ကို အမကို တာဝန်ပေး၊ အချဉ်ကို တူမကိုလုပ်ခိုင်း၊ အသီးသီး တာဝန်ခွဲပေးပြီးတော့မှ ရေချိုးဖို့ပြင်ဆင်ရသည်။

[IMAGE: https://images.ecency.com/DQmPnzwC3ZQL3794SS5Em7Ayc97XjRWKJsoWFgZRQF6Czcw/img_20230325_185151_330.jpg]

ဖက်ထုပ်ကြော်ပြီးရင်လဲ ဓာတ်ပုံရိုက်ထားဖို့ တူမကို အသည်းအသန်မှာရသည်။ အိမ်ကလူတွေက လက်အလွန်သွက်သည်။ ဓာတ်ပုံရိုက်ဖို့ပြောမထားလျှင် ကိုယ်ရေချိုး ပြီးချိန်ဆို ဘာမှ လက်စလက်နကျန်မှာမဟုတ်။

[IMAGE: https://images.ecency.com/DQmNnmts5HAnHEX9pgvoMfrKaZxXMgprF9wyuKiUxBhZW1b/img_20230325_183022_951.jpg]

ဒီလောက် အလုပ်ရှုပ်တဲ့ကြားက နောက်တစ်ခါ အချိန်ရလျှင် ပုစွန်ဆိတ်လေးများကို ကြိတ်ပြီး ကြော်စားအုံးမည်လို့ စိတ်ကူးထားသည်။ ထိုနောက်တခါကတော့ အချိန်ဘယ်လောက် ကြာအုံးမည်မသိပေ။

@nweoomon
25-3-2023